موضوعنا اليوم هو موضوع الاختلاط ذلك الموضوع الشائك جدا عند البعض والشيق جدا عند البعض الاخر والاغلب ، وعنى احب دايما لما افكر فى الموضوع دا ابدأ بحديث النبى صلى الله عليه البر لا يبلى والذنب لا ينسى والديان لا يموت اعمل ما شئت كما تدين تدان ، واللى يشغلنا فى الحديث اخر عبارة فيه اللى هى كما تدين تدان ، واظنكم يا جماعة فهمتونى وفهمتوا عايز اقول ايه.. الاختلاط غالبا ما يؤدى الى علاقات اثمة وزى ما الواحد هيأذى بنات الناس برضه هيترد له فى اهله وبناته واخواته
وطبعا عشان نتكلم عن موضوع الاختلاط هنلاقى نفسنا اكيد بنتكلم فى موضوع الحب اللى هو ملازم لموضوع الاختلاط واللى هو ممكن نقول الاساس عند كل الشباب انه يتم الاختلاط عشان يحب ويعيش قصص الحب اللى عارفين نهايتها طبعا...واحنا فى كلامنا هنتكلم عن الشاب او الرجل وبالطبع مفهوم ان الامر برضه يسرى على الفتاة والمرأة
اكيد مقدمة كلامنا مش نهاية القول فى الاختلاط ، بالطبع لسه فى الكثير اللى نحب نضيفه ، تعالو نشوف ايه مفهوم الاختلاط المعروف عند الشباب او المطلوب من الغرب انه يوصله للشباب وان الشباب يأمنوا بيه ، المفهوم عندهم ان البنت بالنسبة للشاب تبقى صديقة عادى زيها زى اى شاب والعكس برضه بالنسبة للبنات ، يعنى زى مانا ليا اصحاب شباب يبقى لى صاحبات بنات , والامور ماشية عادى جدا ونتقابل ونتصل على بعض ونقعد ونحل مشاكل بعض ونتزاور ، وكله تحت بند الصداقة والاخوة !!!!ازاى يعنى؟!!!؟ ، ازاى شاب هيبقى جنب فتاة وميشعرش باى شعور ناحيتها
الفكر دا اوربى علمانى وضرب من الخيال يا جماعة ، ومفيش دين جه الا ومنع موضوع الاختلاط اصلا
تعالوا نسلم معاكو ان فعلا ممكن تبقى فى صحبيه بالشكل دا.. ولنفترض جدلا مفهوم الشلة اللى تحتوى الشباب والفتيات ..طبعا فى الشلة شاب هيعجب باحدى الفتيات وفتاة تعجب باحد الشباب .. اكيد مش عيب ولا حرام اساسا لو فى جو غير دا .. بس شوف بقى اللخبطة ان غالبا بيحصل الحب ابو طرف واحد .. ولو حصل وكان فى حب من الطرفين هتلاقى شاب اخر من الشلة معجب بالفتاة او فتاة اخرى معجبة بالشاب .. طيب خلصنا من ده كله هنلاقى اللقاءات غير البريئة بين الاتنين واللى غالبا اخرها الزنا
وبعدها يفوق الشاب ويقول دى متنفعنيش .. دى محفظتش على نفسها اضمنها ازاى؟؟؟ .. مع انه اصلا محفظش على نفسه هو التانى .. وزى ما عمل معاها هيتعمل مع اهله وبناته واخواته.. بس هو دا اللى عايزه الشيطان وهو انه يوصلهم لمرحلة الضياع ومش مهم بعد كده اسرة وتوافق والكلام اللى بيحبوش دا
يا جماعة امر الاختلاط مش اطلاقا حرام .. الصحابيات كانوا بيخرجوا فى الجيوش للتمريض .. وكان منهن اللى بتعمل .. وكانوا بيسألوا النبى عليه الصلاة والسلام ويجاوبهم .. يعنى الموضوع لما يبقى له حدود مفهوش حرمانية .. يبقى الموضوع مش تحريم نهائى لفكر الاختلاط .. مادام له حدوده التى تصان بها الاعراض
وكمان مش حرام ان شاب يعجب بفتاة او حتى العكس .. بس المهم هل هى فعلا فتاة واحدة؟؟ ام فتيات وكل شوية تعجبه فتاة؟؟ ويقع مع دى ويبدل مع التانية ؟؟.. كمان هل فعلا لما يتم الاعجاب بيتم سلوك الطريق المطلوب فى الحالة دى وهى التقدم اليها وطلب يدها؟؟ يعنى زى ما بيقولوا الدخول من الباب مش من الشباك؟؟
مش عيب ولا حرام انك تعجب بفتاة وتتمناها لنفسك لكن العيب هل فعلا انت عايزها؟؟ ولا فيلم شفته وحبيت تمثله ، ودا اللى فى الغالب بيحصل يا اخوانى ، الافلام اثرت سلبا على فكرنا ، بقينا بنمثلها دونما شعور ، من العقل الباطن
طيب نشوف مفهوم الغرب لعدم الاختلاط ..بيقول ان لما الشاب بيبعد عن الفتاة بيحصل له احساس بالحرمان والحرمان دا بيعمل له اكتئاب وضيق نفسى .. فالافضل انهم يبقوا زى الاخوات ويتلاقوا فى الجامعات وفى الشغل وفى الشارع عادى الشاب والفتاة زى بعض مفيش فرق بينهم .. وطبعا اخرتها نسمع عن الامراض الجنسية وعن اللواط والسحاق .. طب ما شئ طبيعى ان الشاب يشتاق للفتاة والعكس .. ودا الافضل لانه لما يبقى فى شوق لها بناء على حرمان نفسه منها فبكده هيشعر بقيمتها اكتر ويقدرها اكتر .. انما لو بقت زى الشاب بالنسبة له هيبقى ايه الفرق بينها وبين الشاب ويحافظ عليها ليه؟؟ ويغير ليه؟؟
ومن مصائب الاختلاط مثلا هو وقوع المرتبطين فيه ، يعنى المتزوجة أو المخطوبة يحبها رجل غريب جاء من باب الاختلاط ، وطبعا الممنوع مرغوب ، وهى اكيد عندها مشاكل فى حياتها ويظهر الفتى الهمام بانه الرجل الذى تبحث عنه هذه الزوجة منذ امد طويل ، وربما يظهر للزوجة انه مصلح وبيحاول انه يجعلها تحافظ على بيتها فتحبه اكتر ، اى ذنب اشد من هذا يا اخوانى ؟!!!؟ وربما تسعى هذه الزوجة المخدوعة للطلاق .. وبرضه آخر الأمر نسمع نفس الكلمة من الرجل هيقول دى خانت زوجها... ايه يضمن لى انها متخونيش؟؟؟؟؟
يا اخوانى الايات الكريمة واضحة ورائعة الجمال اقرأوا قل للمؤمنين يغضوا من ابصارهم ويحفظوا فروجهم ذلك ازكى لهم إن الله خبير بما يصنعون ، وقل للمؤمنات يغضضن من ابصارهن ويحفظن فروجهن ولا يبدين زينتهن الا ما ظهر منها... .. الكلام الرائع هذا لن يخرج عبثا ، دا كلام اللى خلقنا وعارف مكنوناتنا ، فاوعى ايها الشاب وايتها الفتاة تستشعروا الطمأنينة فى غيره ، مهما كانت المبررات ، فكر معايا شوية.. صانع الساعة لما يقول لك الساعة مش ضد المياه واوعى تقربها من المياه ، وييجى صاحبك يفتى لك بان الساعة دى ضد المياه ومفيش اى مشاكل ويظهر لك انه خايف عليك من الارهاق فى التعامل والخوف على الساعة ، اكيد انت هتفضل رأى صاحبك لانه الاسهل والافضل والايسر من ناحية الاستخدام .. بس النهاية ايه؟!!!؟نفس الموضوع يا جماعة ربما كلام الغرب ظاهرة جميل ، لكن باطنه يحمل الهم والغم ، واحنا عارفين اخرتها كلام كله لوعة وحزن والام لفراق الحبيبة او جفاءها
الاسلام وتعاليمه لم يرسلها ربنا عز وجل كنوع من الضيق ، بس اكيد برضه ان يكون فيها ابتلاء ودا شئ طبيعى ، انت عايز الجنة اكيد واللى عايز الجنة لازم يبتلى ويمتحن ويكون فى اشياء صعبة فى تنفيذها ، بس الصبر نهاية الفلاح والنجاح وهذا يظهر فى الدنيا قبل الاخرة
نهاية القول اصبروا اخوتى عن الاختلاط واعلموا ان مهما تعبتوا بسبب المغريات لكنكم ستجدوا ثمرة هذا مع زوجاتكم وبناتكم واخواتكم ، البر لا يبلى والذنب لا ينسى والديان لايموت اعمل ماشئت كما تدين تدان
جزاكم الله خيرا والسلام عليكم ورحمة الله وبركاته
السبت أبريل 21, 2007 1:59 pm